Despois dun tempiño sen colgar nada dende
aquí, dende o Pé do Galiñeiro e como non
me podía esquecer dos amigos e amigas viguesas, aínda que o libro xa dese unas voltiñas
nestes case seis meses de andadura, pero por unas ou por outras aínda non se
presentara na cidade, alá vai. O martes 19 de outubro, ás sete da tarde (19h.) na
biblioteca da EMAO, Escola Municipal de Artes e Oficios (García Barbón, 5)
presentaremos as Catas na memoria. A
persecución franquista no Val de Miñor (Laiovento) en xenerosa acollida dese
fervedoiro de iniciativas que é o Ateneo Atlántico.
E como a ocasión ben o merecía terei unha
compañía de luxo. A comezar pola amiga, compañeira dende os ben recuados anos
de Fonseca e dalgúns menos, pero tamén moitos de departamento nas Escolas
Proval, a historiadora Rosa Pascual Abal e o amigo de conversas e xantares, o
poeta, narrador e farturento imaxinador, Xosé María Álvarez Cáccamo. E como de memoria
se trata acompañaranos o presidente
da Asociación Viguesa pola memoria do 36, o admirado activista Telmo Comesaña
Pampillón.
Por se vos vai ben e vos presta acudir o
martes que ven ás sete da tarde na biblioteca do EMAO.
