Amigos e amigas
O próximo sábado, 17 de decembro, cumprirase un ano, menos un
día, que Marta Dacosta nos visitou. Daquela traía do forno as súas Notas sobre a extinción (Galaxia, 2021).
A poeta de residencia e acción gondomareña e miñorá agasallounos coa súa capacidade para recitar e espelicou noutros
seus poemarios: As amantes de Hamlet
(2003), Acuática alma (2011) Dun lago escuro (2014) e Na casa da avoa (2017).
Semellaría un pouco precipitado recuncar coa nosa autora, aínda
que sabemos que nunca deixará de sorprendernos, pero o noso coordinador, Xosé
María Álvarez Cáccamo, escolleuna por outra razón. Marta Dacosta ven de
publicar unha antoloxía poética de xénero Así
fala Penélope (Chan da Pólvora, 2022) que en pouco tempo se converteu nun
acontecemento literario e vai xa pola súa segunda edición. Así pois nesta
ocasión Marta Dacosta non nos traerá a súa voz, senón a de Penélope, a dunha
Penélope que fala e conclúe “Eu tamén navegar”, como no poema de Xohana Torres.
E con ela veñen corenta voces de mulleres galegas que constrúen un relato comunitario e contemporáneo, nunha
selección que reivindica ás autoras, a poesía e a creación literaria. Marta
Dacosta prestaralles a súa voz.
Será o sábado 17 de decembro e comezará ás 12.15h, cunha
duración aproximada de 45 minutos. Para limitar posíbeis interrupcións durante a lectura A Mini abrirá
as súas portas ás 12h.
As intervencións poéticas están pensadas para celebrarse no
exterior, o pé mesmo da Fonte de Zeta, pero como non sempre o demo do tempo nos
deixa, no caso de ser preciso poderemos resgardarnos no interior da taparía.
Se vos presta.
Graciñas
Nota: De ter interese
en compartir mesa e mantel con Marta Dacosta podedes facer a reserva no 646 74
93 28 ou en resposta este post.
Ningún comentario:
Publicar un comentario