O cabreo do Conde II

Imaxe do Iº Conde Gondomar. Anónimo. Madeira/Estofado/policromado. 19cm. altura.
Museo Lazaro Galdíano, Madird

A carta de don Diego retornoume ao maxín lendo un dos capítulos do libro de Miguel Anxo Murado que o outro día gabei nestes retallos. Con moito enxeño o autor acuña o concepto de “nación por exclusión” como resultado da “galegofobia” estendida durante o reinado dos Austrias.

Murado vai recollendo  frases de aquí e  de alá e deixándoas ao longo deste capitulo: “Antes puto que gallego”; “viles camas, peores casas; xente receosa”; “da xeración do ladrón”; “Reino infeliz, desventurado/ de España esterqueira”; “todo é cortellos e sucidade”; “Que demos loubades da terra de Galicia que, xuro a Deus, toda ela é terra de merda”; “Galicia é tan pobre e de tan escasa beleza que non permite gabanzas”. Sabemos que o Estebanillo é galego porque tira couces. Logo tócalle ás mulleres.... e segue Murado recollendo máis e máis referencias.

Podiamos engadir que o escuro Góngora era ben claro: “Oh montañas de Galicia,/ cuya (por decir verdad)/ espesura es suciedad,/ cuya maleza es malicia!,/tal, que ninguno cudicia/besar estrellas, pudiendo/antes os quedáis haciendo/ desiguales horizontes;/al fin, gallegos y montes, nadie dirá que os ofendo”; e o seu contrincante Quevedo replicalle: “Contra Galicia escribiste,/tierra de tocino y nabos,/que, como toda es limpieza,/toda junta te dio enfado./Muy dificultoso eres, /no te entendiera un letrado,/pues, aborreciendo puercos/lo puerco celebras tanto”.

Ese ambiente despectivo, excluínte, ofensivo, que só está nos seus inicios, é percibido por Gondomar. Por iso lle escribe a carta a Andrés de Losada, por iso nunha misiva posterior (17/03/1614) pregúntalle se acabou de ler a carta e se “le ha parezido que estaua borracho quando la escriuí, porque diré que no es gallego vuestra merçed si no me lo agradeze.”

A carta na que demanda a intervención do secretario real para que coute o libro de Brito vaise convertendo nunha intensa e rápida enumeración de persoeiros da nobreza, feitos heroicos mesmo recentes (“Béasse en nuestros tiempos el poco efecto que hiçieron las armadas inglesas el año de 85 en Vayona y el de 89 en La Coruña”, santos, xurisconsultos, etc.,  porque: “No se hallará ni por tradissão ni por escritura que gallego ninguno aya sido traidor a Dios ni a su señor, ni se ha visto gallego herege ni judaizante, ni matador alevoso, ni pueblo rebelado. Pues ¿de qué naçión en el mundo se puede deçir esto? ni ¿qué naçión conquistada sufre sin ofender a su lealtad ni aún con los pensamientos y lo que sufre Galiçia? (…)

E conclúe, quentándose e recorrendo de novo ao mito: “Veamos si ay otro reyno que pueda deçir de si estas calidades. Fue Galiçia reyno y sus reyes tubieron este título primero que ninguno otro de España, pues en tiempo de Santiago sabemos que reinava en Galiçia la reina Loba”.

Deixo para as persoas interesadas o texto completo da carta.

Xoves, 11 de xaneiro de 2018