Inimigos ás portas. Frank López e o anarquismo global.

 

Nesta nova sesión de “Libros con tapas” na tapería “O Cuco" (Pza. Paradela, Gondomar) estará con nós o autor, Bieito Alonso, e máis o director da editorial Galaxia, Xosé Manuel Soutullo, e  o historiador Carlos Méixome. A presentación desenvolverase o mércores día 2 de outubro entre as 19.30 e as 20.30h.

A historia de Frank López —Francisco López García (1885-1967), natural de Bemantes, Miño— non é unha historia común, nin sequera dende os parámetros lexibles en que se moveron os anarquistas de orixe galega nos Estados Unidos. Mais, como escribir sobre alguén que apenas existe? Aínda así, pode resultar de interese a historia dun simple individuo para explicar a traxectoria transnacional dun movemento, como o dos anarquistas galegos, e peninsulares, que, localizado nos Estados Unidos, tamén estendeu os seus brazos pola súa contorna xeográfica, nunha sorte de intercambio propagandístico, financeiro e axitador que o mantivo vivo e vixente durante os primeiros trinta anos do século XX.

Bieito Alonso ofrécenos en Inimigos ás portas. Frank López e o anarquismo global un material de extraordinario interese que nos achega a unha desas moitas persoas, nadas en Galicia, que desenvolveron un papel singular nalgún dos acontecementos históricos máis relevantes do primeiro terzo do século pasado, como por exemplo dirixente do Comité de axuda a causa de Sacco e Vanzzeti.

 

Avelino Cabezas e os seus irmáns. Unha saga de Narón

Dende a gran enxurrada migratoria de finais do XIX ata o inicio da Segunda Guerra  Mundial  bandea esta odisea de cinco irmáns, catro homes e unha muller, nados en Narón entre 1870 e 1878.

Unha historia entrefebrada de esforzo, sufrimento e éxito comercial, recoñecido no mundo empresarial porteño. Quen os guiou foi o maior, Avelino, nado en 1870. Empresario innovador, con sentido da xustiza social, adiantado no mundo publicitario e de escintilante éxito comercial. Faleceu en 1916. Os irmáns seguiron a súa senda ata 1936. Do que foi o seu poderío económico seguen a dar fe dúas casas: unha, “El Paraíso” na Córdoba arxentina, a outra, “Libunca”, no Narón de Ferrolterra.

A aventura dos irmáns Cabezas, reconstrúea os seu descendente, o músico e psiquiatra Antón Seoane. Unha historia de esforzo empresarial, pero tamén de amores e desamores, mortes precipitadas, luxo e declive. Editada por Galaxia (2023)

Sobre este relato de Narón falará o autor e máis o escritor, poeta e profesor da UVigo, Manuel Forcadela  na primeira sesión de “Libros con tapa” da taperia-restaurante “O CUCO”, (Praza da Paradela, Gondomar), o próximo mércores 25 de setembro entre as 19.30 e as 20.30.