martes, setembro 05, 2017

Sangue de porco

O fabricante norteamericano asegura que o vermello das balas 
é un concentrado de sangue de porco
O inexorábel destino laboral do meu pai obrigounos a mudar de vila.  Na altura, aqueles corenta quilómetros significaban tanto un cambio de residencia como o afastamento das referencias vitais e familiares de pai e nai.

Mesmo esas distancias, insignificantes na actualidade, marcaban profundas diferenzas culturais acrecentadas nos meses iniciais, para ir, aos poucos, asumindo a normalidade. Por exemplo na vila para á  que fomos dicíanlle “pitolas” ao que sempre foran “achas” para meter no lume, e “coella”, non ao coello femia, senón ao que, como era evidente, tratábase dunha verza. Ora ben, a diferenza cultural por excelencia, indicadora da non moita humanidade dos novos veciños e que, para nós, profanaban o que, tanto nós  coma eles, chamabamos filloas, enchoupándoas en sangue.

Para os dezaos eran doces, aínda que os maiores dicían que denantes facíanse, na pedra e salgadas, para tomar co caldo, como seguen a facer pola parte da Estrada. Ben saben do que falo, aínda que por estas paraxes sureñas,  miñorás, lle digan, cando menos nalgunhas parroquias, marruchos e nas terras mariñás do norte falen de freixós e a actual estupidez cosmopaleta rampante lle diga crêpe e con esta licenza poidan plantarche unha masa grosa intragable emborreada con nata insípida que sacan dun bote a presión. Non teñen nin idea, a filloa, como nos lembraba Cunqueiro, canto máis fina mellor e pouco precisa de colgarlle  chilindradas.

O caso é que nas terras nas que acougou durante décadas a familia, as filloas eran de sangue. De sangue de porco, claro. Nos primeiros anos na casa nunca se facía aquela porcallada de comer o sangue do porco. Nalgún momento atrevémonos a probalas. Aos poucos fomos gustando delas e non tardou en asignárseme a función de batedor do garfo debaixo da gorxa ferida do porco para que o sangue non callase. Despois veu iso dos botiños de sangue conxelado e o luxo de poder lambiscar filloas ensanguentadas cando  quixeses, sempre que a nai as fixese, finiñas e co azucre derretido polo medio. Agora as asepsias ordenadas pola burocracia bruxeliana pretenden deixarnos sen filloas de sangue, pero resistiremos!!!.

No retallo de onte faciamos referencia  á frase da que botou man o ínclito Trump nunha das súas babecadas. A animalada fai referencia ao máis glorioso dos xenerais dos EE UU, tanto, ou máis incluso, que o mesmísimo Washington, o xeneral Pershing. Heroe  multifacético. Dirixiu as forzas expedicionarias norteamericanas na Gran Guerra e foi o mentor da xeración de altos mandos militares que dirixiron as tropas en Europa (Marshall, Eisenhower, Bradley,Patton) durante a Segunda das Grandes Guerras. Con anterioridade, o tal Pershing fora facer o ridículo a México perseguindo durante case un ano a Pancho Villa sen dar con el.

Antes aínda interveu na humillación do caduco Imperio español, na usurpación dos últimos territorios da gloria imperial dos Austrias e encirrou a depresión das elites intelectuais españolas, da que parece que non saíron aínda, e que recrúa ante o que chaman o “desafío” catalán.
Pershing estivo ao mando das tropas norteamericanas de ocupación en Cuba e Porto Rico, nas Filipinas e Guam. Ao producirse o levantamento filipino trasladouse ás illas para dirixir a guerra de ocupación. Foi neste marco sanguento, nas illas de Mindanao, de maioría  musulmá,  onde ameazou con fusilar os patriotas filipinos con balas enchoupadas en sangue de porco. Seica non chegou a cumprir a babecada, pero fusilou a esgalla; como o seu colega Jacob Smith que deu a orde de fusilar todos os resistentes de dez anos para  arriba.

Contra do que escoito dicir sobre as  capacidades mentais de Trump, son dos que opina que as súas provocacións non son só propias das súas limitacións cognitivas, que tamén, nin da súa matonería pistoleira e machista conxénita, que tamén, senón que responde aos interese de quen lle dá pábulo. E hai quen llo  dá; os que nos someten a un estado de guerra permanente.

Por certo a munición xa está no mercado norteamericano.

Sábado, 2 de setembro de 2017


Ningún comentario:

Publicar un comentario